சென்னை, செப்டம்பர் , 2026: எஸ்ஆர்எம் மருத்துவக் கல்லூரி மருத்துவமனை மற்றும் ஆராய்ச்சி மையம் சார்பில், உயிரித் தகவலியல் மற்றும் கணக்கீட்டு உயிரியல் துறைகளில் நடைபெற்ற மூன்று நாள் தேசிய மாநாடான IndiBioCom 2026 சிறப்பாக நடைபெற்றது. இம்மாநாட்டில் நாட்டின் முன்னணி அறிவியலாளர்கள், ஆராய்ச்சியாளர்கள், கல்வியாளர்கள், இளம் ஆய்வாளர்கள் மற்றும் தொழில்துறை வல்லுநர்கள் பங்கேற்று, உயிரி மருத்துவ ஆராய்ச்சி மற்றும் மருத்துவத் துறையின் எதிர்காலத்தை வடிவமைத்து வரும் வளர்ந்து வரும் தொழில்நுட்பங்கள் குறித்து விரிவாகக் கலந்துரையாடினர்.
பல்வேறு துறைகளைச் சேர்ந்த ஆராய்ச்சியாளர்கள் தங்களது ஆய்வுக் கண்டுபிடிப்புகளைப் பகிர்ந்துகொள்ளவும், புதிய கருத்துகளைப் பரிமாறிக்கொள்ளவும், ஆய்வுத் துறைகளுக்கிடையேயான ஒத்துழைப்பை மேம்படுத்தவும் இம்மாநாடு சிறந்த தளமாக அமைந்தது. குறிப்பாக, கணக்கீட்டு உயிரியல், செயற்கை நுண்ணறிவு மற்றும் உயிரி மருத்துவ அறிவியல் ஆகிய துறைகளில் வேகமாக வளர்ந்து வரும் ஆய்வுப் போக்குகள் குறித்து விரிவான விவாதங்கள் இடம்பெற்றன.
நவீன உயிரியல் அறிவியல் துறையில் முக்கியத்துவம் பெற்றுள்ள மக்கள் தொகை மரபணுவியல், புற்றுநோய் மரபணுவியல், நுண்ணுயிர் மரபணுவியல், கணக்கீட்டு அடிப்படையிலான மருந்துக் கண்டுபிடிப்பு, தடுப்பூசி வடிவமைப்பு, நுண்ணுயிர் எதிர்ப்புத் திறன், எண்ணிம நோயியல் மற்றும் செயற்கை நுண்ணறிவு சார்ந்த உயிரி மருத்துவ ஆராய்ச்சி உள்ளிட்ட பல்வேறு முக்கியப் பொருண்மைகள் மாநாட்டின் அறிவியல் நிகழ்ச்சி நிரலில் இடம்பெற்றன.
நாட்டின் முன்னணி ஆராய்ச்சி மற்றும் கல்வி நிறுவனங்களைச் சேர்ந்த சிறப்பு வல்லுநர்கள் மாநாட்டில் பங்கேற்றனர். ஹைதராபாத் CSIR-செல்லியல் மற்றும் மூலக்கூறு உயிரியல் மையத்தைச் சேர்ந்த பேராசிரியர் கே. தங்கராஜ் மற்றும் IIIT டெல்லியின் இயக்குநர் பேராசிரியர் ஜி. பி. எஸ். ராகவா ஆகியோர் முக்கிய உரையாளர்களாகப் பங்கேற்றனர். மேலும், சென்னை IIT, ஹைதராபாத் IIT, ஜவஹர்லால் நேரு பல்கலைக்கழகம், CSIR-IGIB, CSIR-IMTECH, ICGEB, பனாரஸ் இந்து பல்கலைக்கழகம், BITS பிலானி, IISER பெர்ஹாம்பூர் மற்றும் சென்னையில் உள்ள கணித அறிவியல் நிறுவனம் உள்ளிட்ட பல்வேறு முன்னணி நிறுவனங்களைச் சேர்ந்த வல்லுநர்களும் மாநாட்டில் கலந்துகொண்டனர்.
“ஒவ்வொரு தரவுத் தொகுப்பிற்கும், ஒவ்வொரு மூலக்கூறு வழித்தடத்திற்கும், ஒவ்வொரு கணக்கீட்டு முன்னறிவிப்பிற்கும் பின்னால், மேம்பட்ட நோயறிதலுக்காகவும், துல்லியமான சிகிச்சைக்காகவும், சிறந்த மருத்துவ விளைவுக்காகவும் காத்திருக்கும் ஒரு நோயாளி இருக்கிறார். கணக்கீட்டு அறிவியல் நிபுணத்துவமும் மருத்துவ அறிவும் ஒன்றிணையும் போதுதான் மிகச் சிறந்த கண்டுபிடிப்புகள் உருவாகும்,” என்று எஸ்ஆர்எம் மருத்துவக் கல்லூரி மருத்துவமனை மற்றும் ஆராய்ச்சி மையத்தின் மருத்துவப் புல முதன்மையர் டாக்டர் ஆர். ஜெயந்தி தெரிவித்தார். கணக்கீட்டு அறிவியலையும் மருத்துவத் துறையையும் ஒருங்கிணைத்து, நோயாளிகளை மையமாகக் கொண்ட பயனுள்ள மருத்துவத் தீர்வுகளை உருவாக்க வேண்டியதன் அவசியத்தையும் அவர் எடுத்துரைத்தார்.
“உயிரியல், கணினி அறிவியல், பொறியியல் மற்றும் உயிரிப் பொறியியல் ஆகிய பல்வேறு துறைகள் ஒன்றிணையும் இத்தகைய பன்முகத் துறை மாநாடுகளில்தான் புதிய சிந்தனைகளும் படைப்பாற்றலும் உருவாகின்றன,” என்று SRMMCHRC ஆராய்ச்சிப் புல முதன்மையர் பேராசிரியர் டாக்டர் சுனில் கே. நாராயன் தெரிவித்தார். உயிரித் தகவலியல் மற்றும் கணக்கீட்டு உயிரியல் துறைகளின் வளர்ச்சிக்கும், எதிர்கால உயிரி மருத்துவ ஆராய்ச்சிக்கும் பன்முகத் துறை ஒத்துழைப்பின் முக்கியத்துவத்தையும் அவர் வலியுறுத்தினார்.
நவீன உயிரி மருத்துவ ஆராய்ச்சியில் உயிரித் தகவலியல் முக்கியப் பங்காற்றி வரும் நிலையில், பெருமளவிலான உயிரியல் தரவுகளைப் பொருள்மிக்க அறிவியல் மற்றும் மருத்துவக் கண்டறிதல்களாக மாற்றுவதில் மாநாடு சிறப்பு கவனம் செலுத்தியது. இளம் ஆராய்ச்சியாளர்கள் தங்களது ஆய்வுகளை வாய்மொழி மற்றும் சுவரொட்டி விளக்கங்களின் வாயிலாக முன்வைக்கவும், முன்னணி அறிவியலாளர்களுடன் கலந்துரையாடவும், புதிய கல்வி மற்றும் ஆராய்ச்சி ஒத்துழைப்புகளை உருவாக்கவும் மாநாடு வாய்ப்பளித்தது.
IndiBioCom 2026 மாநாட்டின் மூலம், பன்முகத் துறை ஆராய்ச்சியை வலுப்படுத்துவதுடன், கணக்கீட்டு அறிவியலாளர்கள், உயிரி மருத்துவ ஆராய்ச்சியாளர்கள், மருத்துவர்கள் மற்றும் தொழில்துறை வல்லுநர்கள் இடையேயான ஒத்துழைப்புக்கான புதிய வாய்ப்புகளை உருவாக்கும் நோக்கத்தை SRMIST முன்னெடுத்தது. மேலும், மருத்துவம், மருந்து உருவாக்கம் மற்றும் தனிநபர் சார்ந்த துல்லிய மருத்துவம் ஆகிய துறைகளில் ஆராய்ச்சியை விரைவுபடுத்துவதற்கு தரவு சார்ந்த அணுகுமுறைகள் ஆற்றும் முக்கியப் பங்கையும் இம்மாநாடு எடுத்துக்காட்டியது.
About the Author
