திருவண்ணாமலை, நவ. 5-
திருவண்ணாமலை அண்ணாமலையார் திருக்கோயில் கார்த்திகை தீபத் திருவிழாவை முன்னிட்டு, வடகிழக்குப் பருவமழையால் ஏற்படும் பாதுகாப்பு அச்சுறுத்தல்களைக் கருத்தில் கொண்டு, இந்த ஆண்டும் பக்தர்கள் 2,668 அடி உயரமுள்ள அண்ணாமலையார் மலை மற்றும் பருவதமலை மலைமீது ஏறுவதற்கு முற்றிலும் தடை விதிக்கப்பட்டுள்ளது. மேலும், சுமார் 50 லட்சம் பக்தர்கள் வருவார்கள் என எதிர்பார்க்கப்படுவதால், பாதுகாப்பு மற்றும் போக்குவரத்து ஏற்பாடுகள் தீவிரப்படுத்தப்பட்டுள்ளதாக மாவட்ட ஆட்சியர் வந்தனா கார்க் தெரிவித்தார்.
திருவண்ணாமலை அண்ணாமலையார் திருக்கோயிலில் இந்த ஆண்டுக்கான கார்த்திகை தீபத் திருவிழா நவம்பர் 15-ஆம் தேதி கொடியேற்றத்துடன் தொடங்குகிறது. தொடர்ந்து 10 நாட்கள் காலை மற்றும் இரவு வேளைகளில் பஞ்சமூர்த்திகள் மாட வீதிகளில் எழுந்தருளி பக்தர்களுக்கு அருள்பாலிக்க உள்ளனர்.
திருவிழாவின் முக்கிய நிகழ்வான பரணி தீபம் நவம்பர் 24-ஆம் தேதி அதிகாலை 4 மணிக்கும், அதனைத் தொடர்ந்து மாலை 6 மணிக்கு 2,668 அடி உயரமுள்ள அண்ணாமலையார் மலை உச்சியில் மகா தீபமும் ஏற்றப்பட உள்ளன. இதற்காக சுமார் 4,500 கிலோ நெய் மற்றும் காடா துணி பயன்படுத்தப்பட உள்ளது.
வடகிழக்குப் பருவமழை காரணமாக மலைப்பாதையில் வழுக்கல் மற்றும் பாதுகாப்பு ஆபத்துகள் ஏற்பட வாய்ப்புள்ளதால், கடந்த ஆண்டுகளைப் போலவே இந்த ஆண்டும் பொதுமக்கள் மற்றும் பக்தர்கள் மலை ஏறுவதற்கு அனுமதி இல்லை என மாவட்ட ஆட்சியர் வந்தனா கார்க் தெரிவித்துள்ளார்.
இந்த ஆண்டு கார்த்திகை தீபத் திருவிழாவிற்கு சுமார் 50 லட்சம் பக்தர்கள் வருகை தருவார்கள் என மாவட்ட நிர்வாகம் கணித்துள்ளது. இதையொட்டி, வழக்கமான பேருந்து சேவைகளுடன் ஒப்பிடும்போது 25 சதவீதம் கூடுதலாகச் சிறப்புப் பேருந்துகள் இயக்கப்பட உள்ளன. பக்தர்களின் பயண வசதிக்காகக் கூடுதல் சிறப்பு ரயில்களும் இயக்க நடவடிக்கை எடுக்கப்பட்டுள்ளது.
பக்தர்களின் பாதுகாப்பு மற்றும் கூட்ட நெரிசலைக் கட்டுப்படுத்தும் வகையில், கிரிவலப் பாதை மற்றும் முக்கியப் பகுதிகளில் 1,000-க்கும் மேற்பட்ட சிசிடிவி கண்காணிப்பு கேமராக்கள் பொருத்தப்பட்டு கண்காணிக்கப்படும். இதனுடன் 12 ட்ரோன் கேமராக்கள் மூலமாகவும் தொடர்ந்து கண்காணிப்புப் பணிகள் மேற்கொள்ளப்பட உள்ளன.
மேலும், வெளியூர்களில் இருந்து வரும் பக்தர்கள் தங்களுக்குத் தேவையான கார் நிறுத்துமிடங்கள், அன்னதானக் கூடங்கள் மற்றும் அடிப்படை வசதிகள் அமைந்துள்ள இடங்களை எளிதில் தெரிந்துகொள்ளும் வகையில் புதிய செயலி உருவாக்கப்பட்டுள்ளது. இதன் மூலம் பக்தர்கள் தங்களுக்குத் தேவையான இடங்களையும் செல்ல வேண்டிய வழித்தடங்களையும் அறிந்துகொள்ள முடியும்.
திருவிழாவின்போது முக்கியக் கட்டுப்பாட்டு அறை அமைக்கப்படுவதுடன், கிரிவலப் பாதையின் முக்கிய இடங்களில் சிறிய அளவிலான துணைக் கட்டுப்பாட்டு அறைகளும் அமைக்கப்பட உள்ளன. இவற்றின் மூலம் அந்தந்தப் பகுதிகளில் நடைபெறும் நிகழ்வுகள், பக்தர்கள் கூட்டம் மற்றும் போக்குவரத்து நிலவரம் குறித்த தகவல்கள் உடனுக்குடன் சேகரிக்கப்பட்டு, தேவையான நடவடிக்கைகள் மேற்கொள்ளப்படும்.
மேலும், திருவண்ணாமலை நகருக்குள் நுழையும் 9 முக்கியச் சாலைகளிலும் போக்குவரத்து நெரிசலைத் தவிர்க்கும் வகையில் 25 தற்காலிகப் பேருந்து நிலையங்கள் அமைக்கப்பட உள்ளன. வெளியூர்களில் இருந்து வரும் வாகனங்களை நிறுத்துவதற்காக 153 இடங்கள் கார் நிறுத்துமிடங்களாகத் தேர்வு செய்யப்பட்டுள்ளன.
பக்தர்களின் வருகை அதிகரிக்கும் சூழலில் போக்குவரத்து, வாகன நிறுத்தம், பாதுகாப்பு, கண்காணிப்பு மற்றும் அடிப்படை வசதிகளை ஒருங்கிணைத்து செயல்படுத்த மாவட்ட நிர்வாகம் விரிவான ஏற்பாடுகளை மேற்கொண்டு வருவதாக மாவட்ட ஆட்சியர் வந்தனா கார்க் தெரிவித்தார்.
About the Author
