திருநெல்வேலி மாவட்ட பஞ்சாயத்துக் கூட்டம் பாளையங்கோட்டை கே.டி.சி. நகரில் உள்ள மாவட்ட பஞ்சாயத்து அலுவலகத்தில் நடைபெற்றது. கூட்டத்திற்கு நெல்லை மாவட்ட பஞ்சாயத்து தலைவர் வி.எஸ்.ஆர். ஜெகதீஷ் தலைமை தாங்கினார். செயலாளர் இசக்கியப்பன் முன்னிலை வகித்தார்.
கூட்டத்தில் நெல்லை மாவட்டம் காவல்கிணறு அருகே உள்ள மகேந்திரகிரி இஸ்ரோ மையத்தில் தயாரிக்கப்படும் இன்ஜின்கள் ராக்கெட்டில் பொருத்தி பயன்படுத்தப்படுகிறது. எனவே தொழில்நுட்பக் கல்வி படிக்கும் மாணவ- மாணவிகள் விண்வெளி தொடர்பான கூடுதல் தகவலை அறிந்து கொள்ளும் வகையில் மகேந்திரகிரி “இஸ்ரோ மையம்” சார்பில் அந்தப் பகுதியில் “விண்வெளி ஆராய்ச்சி தொழில்நுட்பக் கல்லூரி” அமைக்க வேண்டும் என்பன உள்ளிட்ட பல்வேறு தீர்மானங்கள் நிறைவேற்றப்பட்டன.
கூட்டத்தில் திருநெல்வேலி மாவட்ட பஞ்சாயத்து உறுப்பினரும், மாவட்ட திட்டக்குழு உறுப்பினருமான கரிசல் எஸ்.சாலமோன் டேவிட் மற்றும் மாவட்டக் கவுன்சிலர்கள் மகேஷ் குமார், அருண் தவசு, கிருஷ்ணவேணி, ரூபா, சாந்தி, சத்தியவாணி முத்து உள்பட பலர் கலந்து கொண்டனர்.